Damat İbrahim Paşa Sebili ve Çeşmesi, Şehzadebaşı

Yapılış Tarihi: H. 1132 / M. 1720-1721

Üstteki Kitabesi;
Hıdîvv-i heft-kişver yaʽni Ahmed Hân-ı Gâzî kim
Müeyyeddir umûr-ı saltanatta savb-ı Mevlâdan

Husûsâ sadr-ı aʽzam edeli dâmâd-ı zî-şânın
Bulup râhat cihân aldı duʽâ a’la vü ednâdan

O düstûr-ı güzîni vasfa hâcet yok hüveydâdır
Halâs u sıdkı bu mevkiʽde işbu ayn-ı îcâdan

Zebân-ı lûlesi der teşneye târîh için Râşid
Su iç bu çeşme-i Dâmâd İbrâhîm Paşa’dan

Niş İçi Kitabesi;
Şehenşâh-ı mekârim-pîşe Ahmed Hân-ı Gâzinin
Vezîr-i aʽzamı dâmâd-ı âli-kadr ü zî-şânı

Ebü’l-hayr-ı nizâm-ı âlem İbrâhîm Paşanın
Reh-i Hakda revân oldu zülâl-i feyz-i ihsânı

Güzel buldu suyun mecrâ-yı ümn-i mekremet hakkâ
Olunca böyle olsun âdeme tevfîk-i Rabbânî

Kuru bir nâmı kaldı dilde ancak çeşme-i Hızrın
Ki icrâ eyledi bu çeşme hükm-i âb-ı hayvânı

Sebîli hod bakılsa bir içim sudur letâfette
Safâda Selsebîl-i bâğ-ı cennet dense erzânî

Hemîşe zât-ı pâki mevrid-i hayr-ı hisân olsun
Ola peyveste yâri lutf-ı Bârî avn-i Yezdânî

Duʽâsın su gibi ezberleyip bu beyt ile herkes
Desinler Tâibâ târîhini gördükçe atşânı

Zülâl-i birr ü ihsânından İbrahim Paşa’nın
İçip şâd eylen ervâh-ı atâş-ı ehl-i imânı

Sebilin Kitabesi;
Hazret-i Sultân Ahmed Hân Gâzi kim onun
Âb-rûy-ı saltanattır zât-ı pâk-i ekremi

Bâ-husûs oldu muvaffak böyle bir düstûra kim
Hem emînü’l-mülkü hem dâmâdıdır hem mahremi

İşte târîh-i selef var ise görmüş söylesin
Böyle şâhenşâh-ı efham böyle sadr-ı aʽzemi

Hüsn-i niyyet göre âsâra muvaffak eyledi
Dinle Vehbî bu iki târîh-i bî-bîş ü kemi

Kıldı reyyân cûd-ı İbrâhîm Paşa âlemi
Fî-sebîlillâh akıttı dehre mâ’-i Zemzemi

Vezîr-i aʽzam-ı Han Ahmed-i Gâzî ki devrinde
Musaffâdır küdûretten gönüller âb-ı nâb-âsâ

Ne öyle pâdişâh geldi selefte taht-ı şâhîye
Ne bir şâh-ı cihân buldu o gûne âsef-i dânâ

Duʽâ-yı halkı isticlâb için ol şâh-ı devrâna
Gelelden sadra etdi âlemi hayrât ile ihyâ

Cihânı etdiler adliyle âbâd eylesün memdûd
Şeh-i devrân ile sadr-ı güzînin devletin Mevlâ

Reşîdâ müjde edip teşnegâna söyle târîhin
Sebîl-i ayn-ı İbrâhim Paşa’dır için sıhhâ

✶ İlişkili Yerler

Damat İbrahim Paşa Camii, Şehzadebaşı

Cami, Külliye