III. Ahmet Çeşmesi, Üsküdar

03.02.2022 tarihinde restorasyon çalışması sona ermiştir.

Yapılış Tarihi: H.1141 / M.1728-1729

^1.Yüz
Semiyy-i fahr-i mevcûdât Sultan Ahmed-i Gâzi
Şeh-i sâhib-meâsir zıll-i pâk-i Hazret-i Vehhâb
Emin-i Yesrib u Batha muîn-i millet-i beyzâ
Ebâ an cedd şeh-i dâna hidivv-i tâhiru’l-en sâb
O hâkân-ı keremkârın bu arz-ı cennet-âsâda
Olub gufrân ille Ümm-i Safiyye haslet-i der-hâb
Onun rûh-i şerifin hayr ile yâd eylemek kasdın
Derûn-i pâkine ilhâm edince Hâlıku’l-esbâb
Vezir-i a’zam ve Damat İbrahim Paşa’nın
Gül-i kâmın hitâb-ı müstetâbıyle edib şâdâb
Şeref âbâd-ı bünyâd eyledikten sonra emriyle
Bu ayn-ı zemzemin çün kıldı icrâsın ona irşâb
Turâb-ı kabrine merhumenin ikrâm için yapdı
Reh-i Hak’da diyâr-ı Üsküdar’a çeşme-i pür-âb
O hâkân-ı cihânı dâima Hakk eyleyub te’yid
Ne kâre azm ederse hükm-i takdir etsin istisvâb
Bu mısrayla Nedimâ söyledi tarih-i itmamın
Bu şehri ma’ ile Sultan Ahmed eyledi sîr-âb 

^2.Yüz
Şehinşâh-ı humayûn-pâye Sultan Ahmed Gâzi
Kerâmetdir olan sâdır o hâkân-ı müeyyedden
O yektâ zıll-ı Hakk kim bir nefes Hakk’dan udûl etmez
Eder kesb-i safâ icrâ-yı ahkâm-ı Muhammed’den
Vücûd-ı enveri kim matla-ı mihr-i saâdetdir
Olur mana-yı şevket zâhir ol şeh-beyt-i müfredden
Vücûda gelmemiştir öşr-i mi’şâr-ı fütühatı
Ki âcizdir kalem âsâr-ı âlişânını adden
Şeref-âbâd-ı bünyâd eyledikde izz ü devletle
Ona bir su bulundu kim nişandır ömr-i sermedden
Vezir-i â’zam İbrahim Paşa’ya edip fermân
Olunca yümnle me’mur o şâhenşâh-ı es’adden
Bu şehre bünyâd eyleyip cümle ahaliyi
Hayat-ı taze buldu re’fet-i hâkân-ı emcedden
Hemîşe dest-i cûdun maksem-i erzâk edip Mevlâ
Vücûd-ı kâmilin âsûde kılsın dîde-i bedden
Tamam oldukda atşân dedi târîhini Şâkir
Gel iç mâ-ı hayâtı çeşme-i Sultan Ahmed’den

^3.Yüz

Âb-rû-yi saltanat Hân Ahmed-i Gâzi ki ânın
Dâima icrâ-yı şer-i Ahmedî’dir hem-demi
Mazhar-ı te’yid edip Hakk âna âsân eyledi
Gayre müşkilter olan her emr-i sa’b u muazzamı(muğzam)
Bu kerâmet kutb-ı âfâk olduğun isbât eder
Buldu İbrahim Paşa gibi sadr-ı efhamı
Rahatıyla kesb-i şevk u ihtiyât etmek için
İhtira’ etti şeref-âbâd-ı şâh-ı âlemi
Nâmın almış bir güherdir suyunu bulsun diye
Su yerine bezl ü îsâr etti bî-had dirhemi
Çeşme bünyâd etmeyi imâ ve işrâb eyleyip
Kıldı me’mur âsaf-ı derya-nevâl ekremi
Öyle dil-cû çeşme-sâr-ı bî-bedel yapdırdı ki
Oldu her bir lülesi âb-ı hayâtın maksemi
Sa’yini hüsn-i kabûl eyleyip Mevlâ karîn
Hıfz ede dâim hatalardan o şâh-ı efhamı
Şâkirâ ! Rahmi içip âbın dedi târihini
Hükm-i Sultan Ahmed icrâ etti el-Hakk zemzemi
 
^4.Yüz

Dedi Hân Ahmed ile bile İbrahim târihin
Suvârdı âlem-i dest-i Muhammed’le Cevâd Allah